ام صفوان أسامة اليوم ا لفرح ازداد عم دارنا
حب توتي الجزيرة في قلوبنا شعارنا
حمسة سنين تمام في الثانية نأخد تارنا
وين نارا تقوم تقدر تقابل نارنا
سيل المتفرجين زاحف وماشي الدار
عشان ما يشاهدو لعبة توتي والتذكار
الموقف صعيب احتارت الافكار
ود توتي الهمام الليلة واقف نار
حين ابتدأ اللعب من اول الصفارة
انتظم الهجوم زادو قلوبنا حرارة
(محمود ود حسن) حارس العرين بجدارة
ادهش اللاعبين حير جميع افكاره
(ابو الناس) حريف في لعبة ديمة شديد
ثابت كلأسد ما بخاف الطوربيد
الباك الهمام (سيد واسمه حديد)
يجيهوا للهجوم مهما عداده يزيد
(ود صالح محمد) ساعد دفاعنا يمين
في شماله (خوجلي) زي الاسود رابطين
بالخفة والنشاط تركو الخصوم هابطين
دفاع توتي شديد هم دائما ثابتين
سنترهاف البلد (فائق) بديع فنان
ربط خط الهجوم صار الخصم حيران
(ود عباس جلال) ومعاه (الزبير عثمان)
يصوبو في القذائف زاوية بالاركان
(محجوب الشايقي) بشكاش الجزيرة الاول
يرسل باص طويل و عليه كل معول
(عوض) استلم بالكورة خطوة تحول
سجل من روائعه العذول اتهول
ديستيفانو توتي (صالح) الفنان
يمر بالاعبين ذي التقول ثعبان
لو استلم الكورة صالح منه الدفاع حيران
مضمونة الاصابة تأتي بكل امان
قلوبنا معاكم جميعها الليلة يا أشبال
العبوا بالثبات ما تخافوا اي نزال
اغلبوا الموردة ومريخ معاه هلال
في لعب الكورة قالوا مافي حاجة محال
في الميدان يا شباب لا تحرجو الحكام
مهما كان ظلم ما تقولوا اي كلام
اللجنة القديمة ما تعملوا فيها نظام
زي ماهي كانت تستمر بسلام
(التوقيع سكرتير السفير بالقاهرة امين مصطفي مهداة لحسين الفكي الهادي كبير مشجعي جزيرة توتي )
الرئيسية 
